धादिङ, ज्येष्ठ–२६
नेत्रावति डबजोङ गाउँपालिकाका उप–प्रमुख सितामाया चोदेनले सोमबार निर्माणाधीन बोलिङजोन गुम्बा मिनी बुद्ध पार्क तथा भोग्टेनी सडक खण्डमा निर्माण भइरहेको सुरक्षा पर्खालको अनुगमन गर्दै विकास निर्माणका काममा गुणस्तर र पारदर्शितामा ध्यान दिनुपर्ने बताइन्।
उक्त अनुगमनको क्रममा उप–प्रमुख चोदेनले निर्माणको गुणस्तर, समय सीमा र स्थानीय जनताको अपेक्षाअनुसार योजना कार्यान्वयनमा आउनुपर्ने आवश्यकता औंल्यायिन् । उनले विकास निर्माण कार्यमा पारदर्शिता र गुणस्तरको ख्याल गर्न सम्बन्धित निकायहरूलाई निर्देशनसमेत दिइन्।
मिनी बुद्ध पार्क स्थानीय धार्मिक पर्यटन प्रवर्द्धनका लागि महत्त्वपूर्ण मानिएको छ भने भोग्टेनी सडक सुरक्षा पर्खालले सवारी आवागमनलाई सुरक्षित र वर्षा याममा हुने सडक क्षतिलाई न्यूनीकरण गर्न मद्दत पुर्याउने अपेक्षा गरिएको छ। स्थानीय बासिन्दाहरूले पनि योजनाको प्रगति र उप–प्रमुखद्वारा गरिएको अनुगमनप्रति सकारात्मक प्रतिक्रिया जनाएका छन् ।
गाउँपालिकाले आगामी दिनमा यस्ता योजनाहरू प्रभावकारी रूपमा कार्यान्वयन गर्न सरोकारवालासँग समन्वय गर्दै जाने जनाएको छ ।
